Ons Missie
Om bekostigbare ontspanning en vermaak
binne 'n
familie- en omgewingsvriendelike opset aan
te bied. Ons doel is andersyds ook om 'n ontspanne atmosfeer te skep tydens saamtrekke waar elke volwassene en kind
die verantwoordelikheid op hom- of haarself neem om die ongeskrewe reëls na te kom. Die formaliteit van vergaderings
en komitees is nie deel van Benwa nie en elke persoon bepaal self hoe die saamtrek vir hom of haar sal verloop. Die
klem in Benwa lê op ontspanning terwyl vermaak ook tydens saamtrekke aangebied word.
Ons Geskiedenis
Terwyl Ben Theunissen die Vroeë-oggendsessie op Jakaranda
94.2 aangebied het, het hy besluit om ‘n groep woonwakampeerders na Loskopdam te neem vir ‘n naweek van ontspanning
en vermaak. Een honderd woonwaens het die naweek meegemaak wat inderdaad ‘n reuse sukses was.
Die behoefte daarna, was so groot vir nog sulke naweke dat daar
besluit is om eenkeer per maand te gaan kamp.
Nadat hy die diens van Jakaranda 94.2 verlaat het, het die vriendekring
voortbestaan en word daar steeds eenkeer per maand gekamp by verskillende parke onder die vaandel van BENWA.
Tydens BENWA-naweke word daar op vermaak en ontspanning gekonsentreer
met die twee spanne, die Bobbejane en Vlakvarke, wat mekaar die stryd aansê op verskeie terreine.
Die standaard van parke wat besoek word is prioriteit en eenmaal
per jaar gaan kamp ons vir ‘n week of twee, (gewoonlik by die see).
BENWA het al besoek afgelê by Mosambiek met 57 gesinne en La
Mouette op die Noordkus met 35 woonwaens.
Daar word ook treinritte onderneem soos bv. Die Garnaalfees
in Komatipoort, die Druiwefees in Nylstroom en ook die Goudpanfees in Pelgrimsrus. Somtyds reël ons bustoere na
die Wildtuin ens.
